LIGA GALEGA FEMININA DE SEGUNDA DIVISIÓN: C.D. AS PONTES S.D. DUBRA (0-1)
O As Pontes feminino despediu a liga diante da súa afección cunha amarga derrota (0-1) diante do xa campión, Dubra, nun partido que estivo condicionado polo mal estado do terreo de xogo, moi embarrado e moi pesado para trenzar as xogadas. O resultado final é inxusto, xa que o As Pontes, sen facer un bo partido, fixo méritos para acadar un punto ante un rival do que se esperaba máis, ó que, por outra banda, cun empate xa lle era suficiente para proclamarse campión de liga ó superar no coeficiente particular ó Pastoriza, equipo que descansa na derradeira xornada do campionato. O partido foi moi disputado sendo as ocasións máis clara para o cadro pontés ó longo de todo o encontro. A primeira foi de Carlota que enviou o balón alto. Xa a piques de chegar ó descanso, Noelia desperdiciou unha boa oportunidade para inaugurar o marcador, pero o seu disparo saíu alto. As visitantes apenas inquietaron a portería de Leti nestes primeiros corenta e cinco minutos.
Na segunda parte o xogo seguía discorrendo do mesmo xeito, con maior iniciativa pontesa, que nos minutos 26 e 28 tivo dúas claras ocasións. Primeiro, o disparo de falta de Noelia sae un pouco alto e despois Lau, nunha inmellorable posición, envía o balón ás mans da porteira visitante. No minuto 36 Noelia Ameneiro mandou o esférico un pouco desviado. Sen embargo, cando todo o mundo contaba que o partido remataría sen goles, chegou o único gol do partido, nun mal entendemento das defensas do As Pontes, que aproveitou Rebeca, a única que creou certo perigo na portería local, para mandar o balón pegado á cepa do poste dereito que non chega atallar Leti. Ó final, ledicia nas xogadoras visitantes polo título de liga alcanzado e decepción nas pontesas, que, cando menos, fixeron méritos para acadar un punto. O As Pontes remata a liga no campo do Tordoia. Sexa cal sexa o resultado, remata a competición na quinta posición.
FICHA DO PARTIDO
CD AS PONTES: Leti, Mireia, Silvia, Jani, Noelia, Sara (Lía, 46), Malena, Noelia Ameneiro, Paula (Carla, 60), Carlota e Lau.
SD DUBRA: Nuria, Araceli (Nerea, 86), Patricia, Begoña, Helena (Laura, 66), Verónica (Jeni, 82), Tamara, Belén, Rebeca, Lucía e Ana.
ÁRBITRO: Jeisson Aguado Castaño, da delegación de Ferrol. Sen complicacións. Tarxetas amarelas a Lau, do As Pontes, e a Lucía, do Dubra.
GOL: 0-1, Rebeca (minuto 90).
CAMPO E INCIDENCIAS: Poucos espectadores no anexo José, do campo do Poboado, con apenas medio cento de afeccionados en tarde fría e chuviosa. Presenza de seguidores do Val do Dubra, concello ata 1960 coñecido como Buxán.
Nova cortesía de A.F.