Nota de prensa BNG: Orzamentos Xunta 2018: nin un euro para As Pontes

Nos Orzamentos 2018 da Xunta, aprobados polo PP, non hai nin un euro público para As Pontes. Xa é habitual que o PP se esqueza, ano tras ano, de realizar investimentos na nosa vila; de feito a maioría dos edificios públicos que temos (piscina, Casa da Cultura, Escola Infantil, …) foron obra do Concello; as últimas actuacións da Xunta foron co goberno bipartito, impulsadas polas Consellarías do BNG: Centro de Día, vivendas interxeneracionais, e a ampliación de Penapurreia.

Nova estrada de acceso a As Pontes

Agora, nos Orzamentos de 2018, aparecen 0,5 millóns de euros das obras do novo acceso previsto para As Pontes, polas necesidades de Endesa para reformar a Central; o resto, 3 millóns, executaranse para 2019 e 2020; mais, non son cartos públicos, son os que aporta Endesa á Xunta para realizar as obras.

Nesta operación, o noso Concello perde os ingresos (o 2,8 %) que lle corresponderían por impostos se a obra fose realizada por unha empresa privada, xa que ao ser unha administración pública está exenta.

Namentres outros organizan visitas turísticas ao Parlamento, o BNG foi o único Grupo Parlamentar que presentou emendas a estes orzamentos para As Pontes: incremento de persoal en Pediatría e Xinecoloxía, implantación do servizo de Raios X, inicio da Residencia Xeriátrica, e cumprimento do Plan da Minaría.

É o abandono histórico das Pontes por parte dos gobernos do PP na Xunta; pero tampouco ao goberno municipal se lle coñece ningunha reivindicación, ningunha proposta, ningunha reunión coa Xunta, coas Consellarías, para trasladar necesidades presentes e futuras da nosa vila e concretalas nos orzamentos; de momento, a súa actividade principal -e case única-, a realización de festas, semella que non precisa do apoio a Xunta.

Un, o PP, non fai nada por As Pontes, e o outro, o PSOE local, tampouco; non é quen nin de pedir.

Sabiades que ……..
… por cada charla saudábel no Alovi pagamos á Voz de Galicia máis de 4.000 € …; … que unha reportaxe sobre As Pontes enclave industrial na Voz son case que 2.000 € …; … que dende marzo a decembro aprobáronse pagos á Voz por máis de 80.000 €¡¡¡