Nota de prensa BNG: O BNG DENUNCIA A CONVOCATORIA DUN PLENO URXENTE PARA APROBAR MÁIS DE 400.000€ EN FACTURAS

O Alcalde das Pontes ven de convocar para o luns, 31 de maio, ás 18 horas, un Pleno urxente, o que non sería noticia nunhas condicións normais. Pero As Pontes leva case que tres anos fora da normalidade.
Chama a atención que o PSOE pontés convoque unha sesión urxente cando o xoves, 3 de maio, dous días despois, vai ter lugar o Pleno ordinario. Tamén é chamativa a hora de celebración, xa que a maioría dos Plenos, por non dicer todos, son pola mañá por decisión do Alcalde.
Para o BNG, tanta excepcionalidade non pode ser coincidencia, ten que respostar a unha estratexia, que pode xustificarse no contido da sesión: aprobar facturas que no seu total supoñen case que 500.000€ e que deben ser tratadas en Pleno por ter, segundo os informes técnicos, irregularidades, tan importantes nalgún caso como que non lle corresponda pagalas ao Concello.
O BNG recorda que é o segundo Pleno en menos dun mes con contido similar. No anterior facilitouse o pago de facturas, tamén con reparos dos servizos técnicos municipais, por uns 100.000€. A reiteración pode supor dificultades de tipo legal para que o PP manteña o seu apoio ao PSOE.
As Pontes, 29 de maio de 2010
Asemblea Local do BNG