Bonito e entretido partido o que disputaron este sábado o Esteo e O Parrulo, que serviu de presentación oficial do club e ó mesmo tempo de homenaxe a Pellón, un dos mellores deportistas que deu As Pontes e que despois de 23 anos dos que a maior parte estivo nos dous equipos que se enfrontaban hoxe nesta súa homenaxe- deixou o fútbol sala activo. O Esteo estivo neste partido moito mellor ca no partido de copa. Na primeira parte o marcador rexistrou un 2-0 a prol dos locais con dous equipos que, a pesar de ser un encontro amigable, estiveron moi enchufados no xogo facendo un bonito fútbol sala e creando ocasións de gol. Por parte dos locais houbo dúas nas botas de Héctor e polos ferroláns Jacobo estivo a piques de marcar no minuto oito. O primeiro gol do Esteo chegou no minto 16 nun balón que rouba Pelu e marca. A falta de dez segundos para o descanso hai unha falta ó borde da área visitante que lanza maxistralmente Rubi polo escuadro establecendo o dous a cero.
Con este resultado da primeira metade comeza o segundo tempo coa mesma tónica de xogo, dominio alterno e con ocasións para os dous equipos, sendo as dúas primeiras para O Parrulo, estando na primeira moi acertado Ito e na segunda o lanzamento desde a esquerda de Jacobo foise ó longueiro. Xa mediado este segundo tempo, Jacobo marca o gol dos ferroláns despois dun despiste da zaga do Esteo. Logo, Rubi anota o segundo da súa conta particular tras un saque de esquina.
O partido creceu en intensidade cun Esteo que se defendía ben e un Parrulo que trataba de igualar a contenda. Tivo boas ocasións o cadro ferrolán, pero tanto Ito como despois Iván estiveron moi acertados nas súas intervencións. Cando xa o encontro estaba a piques de rematar chega o cuarto gol local e o terceiro de Rubi, que fixo un gran partido dentro do bo nivel de todo o equipo, rematando o encontro cunha clara vitoria do Esteo, que neste choque amosou boas maneiras.
FICHA DO PARTIDO
O ESTEO FS: Choto, Gerardo, Héctor, Rubi, Rober cinco inicial- Pelu, Diego, Gerveno, Ito e Iván.
O PARRULO FS: Ángel, Villas, Víctor, Jacobo, Borja cinco inicial- Carlos, Isma, Óscar e Alberto
ÁRBITROS: Trío feminino para dirixir este encontro amigable, con Raquel Manteiga e Beatriz Remeseiro en pista e Laura Vila, na mesa, da delegación da Coruña. Tarxetas amarelas a Víctor e Isma, do Parrulo.
GOLES: Min. 16 (1-0), Pelu. Min. 20 (2-0), Rubi. Min. 27 (2-1), Jacobo. Min. 32 (3-1), Rubi. Min. 40 (4-1), Rubi.
INCIDENCIAS: Partido amigable de homenaxe a Pellón, que fixo o saque de honra e recibiu senllas camisetas dos dous equipos, disputado este sábado no pavillón municipal da Fraga, que rexistrou unha boa entrada, uns 250 afeccionados nas gradas.
Nova cortesía de Xose Ferreiro e A.F.