ROMARÍA DA PENA DE FRANCIA

Esta fin de semana dúas parroquias pontesas celebraron os seus tradicionais festexos do verán, a romaría da Pena de Francia, na parroquia do Freixo, e o San Cristovo do Vilar, na parroquia da Vilavella.
Ó norte da parroquia do Freixo tivo lugar unha das romarías máis antigas da comarca, a da Virxe da Pena de Francia, cuxo santuario data de 1665. A ermida está situada nunha frondosa carballeira á beira do rego de Solloso e da aldea do mesmo nome, e ó pé da mesma ten lugar a romaría e a festa, que este ano xuntou a numerosos romeiros de varios lugares do concello e da comarca. Os dous días houbo misa, procesión da virxe e música.

Medio milleiro de romeiros levaron as súas merendas a esta bonita carballeira e gozaron desta festividade, acompañada dunha excelente climatoloxía, que estivo amenizada coa música tradicional dos Trevillas e a máis moderna a cargo do dúo Bambú.

ORIXE DO SANTUARIO E O NOME DE PENA DE FRANCIA
Segundo os datos do arquivo da diocese de Mondoñedo e no da parroquia do Freixo, este santuario foi construído no ano 1665 polos condes de Montenegro, Fernando Sanjurjo Montenegro e Florencia de Estua y Miranda, que vivían no pazo de Pude da parroquia de San Simón da Costa (Vilalba), e sendo cura da parroquia do Freixo –unha das máis importantes do territorio- o irmán do conde, Antonio Sanjurjo Montenegro.
A capela está en bo estado, sendo reformada a mediados do século pasado, conservando o seu antigo pórtico da entrada e a espadana. Ten un sinxelo retablo e catro imaxes.
O feito de levar o nome de Pena de Francia ven da devoción que sentía a condesa de Montenegro pola virxe de “Peña de Francia” do santuario do mesmo nome, situado ó sur da provincia de Salamanca, preto da bonita vila de La Alberca. Este santuario ten a súa orixe na chegada a esta zona, no século XI, de traballadores franceses, o que ocasionou que paraxes, montes e ríos levasen o nome de “Francia” (Peña de Francia, Sierra de Francia, Nava de Francia,…), e incluso algúns apelidos franceses perduran na actualidade. O documento máis antigo que fai referencia a este suceso data de 1293.
A invasión árabe obrigou ós habitantes desta comarca a refuxiarse nas montañas levando consigo as súas modestas pertenzas e as imaxes dos seus santos. Pasaron os séculos e no XV foron achadas naquel lugar catro imaxes, a da Virxe, a de Santiago, a de San Andrés e a do Santo Cristo. Construíuse o santuario que levaría o nome de “Virgen de Peña de Francia”, o cal na actualidade é moi visitado por devotos e curiosos.
Tamén apareceu unha lenda moi comentada, segundo a cal a Virxe aparecéuselle a un estudante francés que lle impulsou a procura da súa imaxe agochada en terras de occidente, nunha cova, coa promesa de construír alí unha igrexa. O mozo, chamado Simon Rolan, veu de peregrinación a Santiago e no regreso ó seu país acercouse ata a “Peña de Francia” onde achou a imaxe da virxe. Adicouse a ela e no alto da montaña, situado a 1.753 metros de altitude, construíu unha capela, que no século XV foi substituída por outra máis ampla e un cenobio.
O Freixo, 7 de setembro de 2009 (AF)