TERCEIRA DIVISIÓN: C.D. AS PONTES U.D. SOMOZAS (1-0)
O temperán gol de David Amado ós cincuenta segundos de iniciarse o partido serviu para que o As Pontes vencera ó Somozas nun partido moi disputado, pero con máis control do balón e dominio por parte dos ponteses. Tralo gol o Somozas foise para adiante intentando igualar o encontro, pero o As Pontes defendíase ben e contragolpeaba con perigo. Puido incrementar a vantaxe o equipo pontés no minuto oito cando Chote na boca de gol envía o esférico fóra. Posteriormente, Berros dispara dende lonxe que se vai fóra da porta pontesa e no 23 o meta Marcos chapou un balón ante Carlos. Diego, polo Somozas, Sergio Arias e de novo Chote tiveron boas ocasións para marcar. A mellor ocasión do Somozas neste primeiro tempo foi no minuto 42 cando un forte chut de Carlos que Marcos despexou coa punta da man a córner. A piques de rematar o primeiro tempo Sergio Arias plantouse só ante Abraham e o dianteiro de Portomarín enviou o balón alto.
O segundo tempo comezou como a primeira parte, xa que no primeiro minuto nun ataque levado pola banda dereita Borja centra e David Amado non chegou a rematar estando o porteiro batido. Despois Sergio Arias manda un forte disparo que Abraham despexou a córner, e de novo David Amado envía o balón rozando o poste da portería do meta somocense. Respondeu o Somozas por mediación de Diego e Rubén en dúas ocasións. Nos instantes finais o Somozas, tratando de empatar o encontro, achegábase con perigo á portería local e así no minuto 43 Piscu na boca de gol estivo a piques de logralo, pero Marcos noutra xenial intervención mandou o balón fóra, rematando o partido con vitoria do As Pontes que lle asegura matematicamente a sexta posición, xa que supera en catro puntos ó Ordes, que nesta penúltima xornada perdeu na casa diante do Compostela, equipo que visitará o As Pontes no derradeiro partido de liga.
FICHA DO PARTIDO
CD AS PONTES: Marcos, Rochela, Nano, Chote, Totti (Pablo López, 71), Esmorís, Borja (Dieguito, m. 71), Bossa, Sergio Arias (Dani, 85), David Amado e Pablo Domínguez.
UD SOMOZAS: Abraham, Álex Bao (Jesu, 70), Dani, Piscu, Fiuza, Berros (Nando, 79). Diego, Denis, Carlos (Emilio, 61), Suso e Rubén.
ÁRBITRO: Óscar López Fernández, da Coruña, auxiliado por Lago Barros e González Rey. Expulsou no minuto 78 a Jorge Nano, do As Pontes, por dobre amarela, a segunda moi rigorosa. Ademais amoestou a Esmorís, do As Pontes, e Piscu e Berros, do Somozas.
GOL: Min. 1 (1-0), David Amado.
INCIDENCIAS: Partido da penúltima xornada de liga de Terceira División disputado no campo do Poboado e tarde soleada e coa asistencia duns 300 espectadores nas gradas, con presenza de afeccionados somocenses.
Nova cortesía de A.F