Nota de prensa XPAP: En Marea esixirá na Xunta melloras no centro de saúde de As Pontes
Esta mañá achegouse ata a nosa vila a vicepresidenta segunda do Parlamento e deputada de En Marea, Eva Solla, para falar das deficiencias e necesidades do centro de saúde de As Pontes.
Consegue en tempo real avisos de novos artigos no teu dispositivo, subscribete agora.
Na xuntanza que mantivo con varios membros desta plataforma, denunciouse o alarmante nivel de deterioro do noso centro e a situación intolerable que se está a producir. Incremento das listas de agarda, falla de reposición de baixas e vacacións do persoal, deficiencias na atención a domicilio, falla de medios técnicos precisos para garantir unha correcta atención ou as graves humidades son algunhas das cuestións denunciadas por En Marea e Xunt@s por As Pontes.
Esta denuncia foi xa presentada polo grupo municipal de Xunt@s por As Pontes no pleno do Concello obtendo como resposta por parte do Goberno municipal que falaría con Conselleiro de Sanidade, Jesús Almuiña, para lle trasladar o problema pero nada se sabe desta xestión prometida polo goberno local. Unha situación que provocou xa a mobilización dos veciños e veciñas que reclaman unha solución urxente para a situación do centro de saúde.
A deputada de En Marea, Eva Solla, pola súa banda asegurou que “non é de recibo” que non se estean a cubrir as vacacións e baixas dos profesionais médicos, o que provocou situacións intolerables como as vividas o pasado verán con listas de agarda de ata 20 días para unha consulta ordinaria. Tamén destacou outras deficiencias nas instalacións, xa que presentan humidades. A Xunta comprometeuse a arranxar a cuberta do centro de saúde, pero a realidade é que a día de hoxe nada se sabe e non existe ningunha partida nos Orzamentos para esta obra. Mentres tanto os usuarios e usuarias e o persoal do centro ten que continuar a padecer as importantes goteiras que se suceden nos días de choiva en distintas zonas do centro.
Outra das reivindicacións históricas da veciñanza, que subliñou Eva Solla, foi a referida á necesidade de dotar ao centro dunha máquina de Raios X que evite os continuos desprazamentos ás urxencias de Ferrol e a lista de agarda nas consultas.
O centro de día foi outro dos temas tratados na xuntanza que como explicaron “incomprensiblemente” están sen cubrir todas as prazas pese a existir lista de agarda. O centro de día ten unha capacidade de 30 prazas, das que só sairon a licitación 16. A deputada de En Marea anunciou que preguntará tamén no Parlamento de Galicia por esta cuestión co fin de saber porque se está a dar esta contradición.
Máis información en www.xuntosporaspontes.com