Nota de prensa do BNG: O BNG CRITICA O PRAZO DE SOLICITUDES NA CONVOCATORIA DE DÚAS PRAZAS E RECLAMA A SÚA AMPLIACIÓN

O PSOE fixa cinco días que na práctica redúcense a tres e á mañá do sábado (3 horas).
As Pontes, 06 de xuño de 2014.- En setembro do ano pasado o BNG presentaba, entre outras, a proposta de convocar listas de agarda para todos os servizos municipais, moción que, como todas as que tentaban promover o emprego, foron rexeitadas polo PSOE.
Aínda así, fai un mes que o mesmo PSOE convocaba listas de agarda para peóns e limpeza, cunhas 300 solicitudes, convocatorias que ven de resolver onte, día 5 de xuño.
Nunha outra mostra de desorganización e descontrol, o PSOE fai público (www.aspontes.com/gal/concello/oferta-de-emprego-publico/get/seleccion-de-persoal/111) un proceso para contratación temporal de dúas prazas, palista e condutor de camión, que, segundo as bases, veñen derivadas “… pola baixa prolongada de dous oficiais primeira por enfermidade …”.
O BNG denuncia o procedemento, xa que tense evidenciado como non axeitado noutras ocasións, nas que teñen coincidido o remate da selección coa alta do traballador a substituír, anulando todo o proceso, o que non tería sucedido de terse convocado as listas de agarda.
Mais tamén denuncia o BNG que o mecanismo estabelecido polo PSOE utilízase como escusa para minorar o prazo temporal para as solicitudes -dende o venres 6 até o martes 10 de xuño, cun fin de semana polo medio-, o que dificulta a súa publicidade, a entrega da documentación, e, polo tanto, a igualdade de oportunidades, o que pode dar lugar entre os demandantes a sospeitar dun “amaño”.
O Grupo Muncipal do BNG ven de solicitar unha ampliación do meritado prazo.

Asemblea Local do BNG das Pontes